LAKTAŠI, 08. oktobra – Priča zvuči nesuvislo: Isus Hrist je imao sestru, koja se zaljubila u rimskog vojnika, izdala je brata i otišla s vojnikom u Rim. Ali Rimljani nisu htjeli ni da čuju za nju, pa je živjela u bijedi i siromaštvu. Bila je to kazna za izdaju.

Misel-Hunciker

– Ta sestra sam bila ja. Vjerovala sam da sam to bila u prošlom životu i da na plećima nosim tu krivicu – kaže Mišel Hunciker, voditeljka i nekadašnja supruga italijanskog pjevača Erosa Ramacotija u intervjuu koji je ovog ljeta dala u jednom kafiću u Milanu novinaru njemačkog lista “Štern”.

Vjerovala je i u to da je u prošlom životu bila supruga bivšeg njemačkog SS-ovca, ali nije spriječila njegove zločine. Godinama je bila veganka, zato što se čak i pica pravi od “demonovih sastojaka”. Otkriva da godinama “nije imala seks”, i da je uvijek neko bio pored nje da je kontroliše. Četiri godine nije komunicirala s majkom i starim prijateljima. Uništili su joj brak s Ramacotijem i oduzeli mnogo novca.

– Tako je to kada si u sekti, zatežu ti omču oko vrata sve više i više, sve dok ti ne isperu mozak – kaže Hunciker, koja je skoro šest godina provela u sekti “Ratnici svjetlosti”.

Sredinom 90-tih godina prošlog vijeka Mišel je imala 18 godina i radila je kao model. U Italiji je bila poznata sa reklamnog plakata. Zabavljala se s Ramacotijem, u koga je bila zaljubljena do ušiju. Godine 1996. rodila im se kćerka Aurora, a dvije godine kasnije su se vjenčali.

– Živjela sam u bajci – kaže ona.

Međutim, ožiljci iz djetinjstva su ostavili traga. Roditelji su se razveli, otac, koga je obožavala, počeo je da pije i izgubila je kontakt s njim.

– Eros je bio divan, sve je činio za mene, ali je često bio na turneji, a ja sam ostajala sama kod kuće – otkriva.

Mučile su je sumnje i pitanja s kojima se suočavamo u 20-tim godinama. A onda je počela da joj opada kosa, pa je zatražila pomoć žene po imenu Klelija, tzv. “prana terapeutkinje”.

– Bila je blaga i lijepa i slušala me je. Imala sam osjećaj da me otac ne voli – kaže Mišel.

 

Klelija je to iskoristila. Čule su se deset puta dnevno.

– Kosa je prestala da mi opada. Klelija mi je rekla da prestanem da pušim i ja sam prestala. Imala sam nekoga da me sasluša – kaže Mišel. Kada je posjetila Kleliju, u njenom stanu je bilo još 20-tak ljudi. Tamo je saznala za tzv. “chanelling” (komuniciranje s mrtvima preko kanala).

– Klelija nas je učila da smo izabrani zato što imamo sreću da spasemo svoje duše i da nam duše umrlih šalju poruke kroz kanal – kaže ona.

Rekla mi je da moram da se odvojim od ljudi koji me ne vole, jer mogu samo da mi naude – otkriva. Ispričala joj je da je Ramacoti u prošlom životu bio rimski vojnik koji ju je gurnuo u siromaštvo.

– Moj muž je odavno gajio sumnje prema Kleliji i njenoj sekti. Jednog dana me je stavio pred svršen čin: Ili oni, ili ja. Hunciker se odlučila za novu “porodicu”.

U to vrijeme je postala poznata i u Njemačkoj – kao voditeljka u prvoj sezoni programa “Njemačka traži superzvezdu”. Oduševila je publiku svojim osmjehom, ubirala aplauze. Otkuda osjećaj da je nevoljena?

– Nije to tako jednostavno. Publika nije bila tu kada sam uveče bila sama kod kuće. Publici nisam mogla da ispričam ono što mogu da ispričam nekome ko me voli – objašnjava ona.

Danas ima 41. godinu, udata je za Tomaza Trusardija, nasljednika i šefa modnog koncerna “Trusardi”, s kojim ima dvije kćerke.

Čini se da sada zna šta je ljubav, ali ranije nije bilo tako: kao 17-godišnjakinja je došla u Milano, postala manekenka, zatrudnila u 19-toj. Od vremena u sekti prošle su godine i kaže da nema namjeru da ih tuži. Klelija i udruženje živjli su od njenog novca, bili su njena agencija, čak su joj odredili Klelijinog sina za momka.

– Ali nikoga ne mogu da tužim, jer sam i sama odgovorna za to što sam im se pridružila. Bila sam mlada i naivna – kaže ona.

Godine 2006. više nije mogla da izdrži:

– U sekti je bilo sukoba i zavisti. Počeli su da me kažnjavaju zato što ne funkcionišem, izolovali su me. Kao kad narkomanu uskrate drogu – objašnjava.

Bila je toliko očajna da je napustila sektu.

– Rekli su mi da ću umrijeti ako odem. Vjerovala sam im, ali u tom trenutku mi je bilo svejedno, htjela sam da budem s kćerkom, makar poslije toga i umrla – kaže ona, piše Blic.